Welkom by die  ATKV-Skryfskool van die Noordwes-Universiteit (Potchefstroomkampus) se tuisblad. Ons bied ’n verskeidenheid kort skryfkursusse aan enigiemand wat graag kreatief wil begin skryf of wat sy of haar kreatiewe skryfwerk wil verbeter. Die enigste toelatingsvereiste is skryftalent en ’n passie vir die woordkuns. Kursusse duur tussen een en vyf dae en kan ook elders as op Potchefstroom aangebied word.

Die jaarlikse Winterskool vir skrywers strek oor vyf dae, met aandag aan (drie van die genres van) verhaalkuns, poësie, rubrieke, kinder- en jeugliteratuur, ensovoorts. Vir (voornemende) liefdesverhaalskrywers is die jaarlikse Lenteskool weer die regte geleentheid; drie dae lank word die skryf van liefdesverhale onder die vergrootglas geplaas. ’n Gemeentebladkursus word van tyd tot op ’n Saterdag aangebied, waartydens die kollig op die inhoud en uitleg van gemeenteblaaie val.

Die Skryfskool bied verder jaarliks ten minste vier Kanselierskursusse vir jong skrywers op verskillende plekke in Suid-Afrika aan. Sulke Kanselierskursusse maak staat op die ondersteuning van die PUK-kanselierstrust en strek normaalweg oor ’n Vrydag en/of Saterdag.

Die aanbied van skryfkursusse op aanvraag is ook moontlik; kom gerus hieroor met ons in aanraking.


Winterskool weer met trots in 2018 aangebied

 

33 jaar nadat die eerste Herfsskryfskool op Potchefstroom aangebied is (in April 1985), maak die ATKV-Skryfskool van die Noordwes-Universiteit steeds so. Soos in die afgelope twee jaar, neem dit egter die vorm van ’n Winterskool aan.

Dosyne gevestigde skrywers het oor die jare hier ’n wegspringplek of hupstoot vir hul loopbane kom kry. Van 4 tot 8 Junie 2018 bied die ATKV-Skryfskool weer so ’n skolingsgeleentheid aan opkomende woordsmede. Opwindende, bekroonde skrywers wat ook boeiende geselsers is, kom gee inspirasie en wenke aan dié wat die leer wil klim as skrywers van verhale, rubrieke en gedigte: Etienne van Heerden, Hans du Plessis, Franci Greyling, Jolyn Phillips, Jaco Kirsten, Martie Swanepoel, Jan Vermeulen, Bernard Odendaal, Gerda Taljard en Valda Jansen.

Die hartklop van die Winterskool is die werkswinkels waartydens kursusgangers kan slyp aan die pennevrugte wat hulle by inskrywing moet voorlê. Jaco Kirsten (rubrieke), Hans du Plessis (verhaalkuns) en Bernard Odendaal en Jolyn Phillips (digkuns) sal die leiding by die drie werkswinkelgroepe neem.

’n Ander sterkpunt van die Winterskool is dat kursusgangers uit die spreekwoordelike perd se bek kan hoor wat uitgewers verwag van skryfwerk wat die paal gaan haal by die manuskripkeurders. In 2018 kom maak verteenwoordigers van ses bekende Afrikaanse uitgewers weer ’n draai by die Winterskool.

Stel jy belang om die Winterskool 2018 by te woon? Benut die hierby beskikbare interaktiewe skryfboekie om jou aan te meld. Kontak vir Kobie van Aswegen (018 299 1783) van die ATKV-Skryfskool vir meer inligting.

Neem kennis: Die skryfboekie moet afgelaai word om te kan werk. Die aflaai-funksionaliteit word nie ondersteun in Edge-weergawe 12, Internet Explorer, Safari 10 (en vroeër), of Opera-weergawe 12 (en vroeër) nie. Gebruikers van hierdie webblaaiers kan die boekie by  Kobie van Aswegen (018 299 1783) aanvra. Bevestig asseblief jou aanmelding met Kobie om jou plek te verseker.